Блог - Кликнете за да прочитате - Baby Center Интернет продавница
0

Кликнете за да прочитате

Пролетни прошетки во природа

„Пролетта е годишно време во кое сонцето го грее дождот и дождот ги мие сончевите зраци...“

Frances Hodgson Burnett, The Secret Garden.

Прошетките на отворено се добра промена која ја носи топлото време, особено за мајките кои сеуште се на породилно отсуство во текот на зимата биле претежно дома. Пролетта ви дава шанса за дружба и физичка активност, а на детето му овозможува да истражува и да научи многу за природата, растенијата и животните. Со игра и престој во природа, детето ги развива своите моторни (движење) и когнитивни (умствени) способности. Затоа Ви препорачуваме да излезете надвор и да ја откриете убавината на природата во пролет, заедно со Вашето дете.
Ако имате мало бебе кое го возите во количка, тоа навистина ќе ужива во дневните дремки на свеж воздух.
​​​​​​​Движењето и нишкањето бргу ги заспива бебињата, па откако ќе заспие бебето, не заборавајте да го покриете со тенка покривка. Ако ја покривате количката за да му биде потемно, заради заштита од провев или поради друга причина, многу е важно таа да не биде целосно покриена, туку да обезбедите струење на воздухот околу бебето. Така ќе се одржи нормална температура во количката и ќе се избегне прегревање на бебето. Треба да внимавате и да нема играчки и други предмети во количката, кои може да предизвикаат незгода во моментите кога нема директно да го гледате вашето бебе. Истата препорака се однесува и за креветчето во кое спие детето дома. Треба да биде овозможено струење на воздухот, особено во топлите месеци, и да нема дополнителни играчки и други предмети во креветчето. 

Кога напролет шетаме надвор со бебе и мало дете, многу е важно облеката да биде слоевита. Да можете по потреба да соблечете еден слој кога е топло или да облечете плус еден слој кога ќе залади. Не сакате да го преладите Вашето малечко, ниту да му биде премногу топло, па да биде кенкаво и раздразливо. Обидете се да се држите до правилото, кога шетате надвор, бебето да го облекувате еден слој повеќе од вас, без разлика дали времето е топло или посвежо. Така ќе ја избегнете честата ситуација, бебето да биде премногу облечено и покриено со ќебе, а вие да шетате со кратки ракави и да уживате на пријатното пролетно сонце. 
За родителите со деца кои сега проодуваат или веќе одат, но не се многу сигурни во одењето па може да паднат и да се повредат, корисни се појасите за шетање и проодување. Во оваа фаза (околу 12 до 18 месечна возраст) бебето не сака да седи во количка, станува многу љубопитно и сака да ги развива своите моторни способности (движење, одење). За да го поштедите бебето од паѓање и гребнатини, а себе си од болка во половината, користете појас за проодување, кој е многу корисна и безбедна алатка ако правилно се користи.
Доколку имате поголемо дете, оставете ги накратко муабетите со другите мајки и татковци и прошетајте низ дрвјата и грмушките со вашето дете. Сигурно ќе уживате во заедничката дружба, а детето ќе има безброј прашања за се околу вас. Игрите како брканица, топка, криенка, играње во песок се работи кои детето, за да ги игра, треба да ги научи од некого. Сметаме дека мајката и таткото се најдобри учители за малото дете. Така низ игра Вашето дете странува свесно за своите способности и ги развива. Доколку падне или се сопне, не го карајте, туку секој пат јасно ставете му до знаење дека мора да внимава. Моторните вештини, но и вниманието и концентрацијата со кои детето се движи и преминува препреки, се учат на релативно рана возраст. Ако не се научи да внимава и не вежба секојдневно преку игра, детето може да биде склоно кон паѓање и повреди во раното детство.

Престојот во природа во пролет неизбежно е поврзан и со крлежите. Не е добро да правите паника и да го спречувате детето да си игра во природа, но треба да знаете неколку важни работи поврзани со озлогласените инсекти. Крлежите почесто се наоѓаат во повисока трева, па најподложни се децата кои шетаат низ овие делови од парковите и тревниците. Кога ќе си дојдете дома после прошетка во паркот, треба да ја промените облеката на детето и да ја истресете, бидејќи често крлежите се закачуваат на облеката, па подоцна доаѓаат до кожата и се закачуваат. Прегледајте го детето набрзина, веднаш, или кога ќе го соблечете за капење до вечер. Внимавајте да не го пренесете вашиот страв и грижа за крлежите на детето, бидејќи тоа сепак треба и понатаму безгрижно да си игра и да ужива во природата. Доколку забележите закачен крлеж, не се обидувајте да го извадите или да го третирате со различни средства. Најдобро е да се упатите до најблиската болница, каде со хируршки инструмент ќе се извади крлежот брзо, безбедно и безболно. Дополнителни лекарства може да му дадете на детето само по препорака од доктор.
За оние меѓу вас кои се трудни, во пролетните месеци треба да ја искористите секоја можност за шетање, за движење и физичка активност во природа. Пешачењето е одлична вежба за трудниците, и оние во раните месеци и во подоцнежна бременост. Во денешно време се поизразена е појавата на зголемена телесна тежина во бременоста. Тежината на жената во бременоста секако расте, но постои нормален дозволен и очекуван раст на тежината и прекумерна тежина. Зголемената телесна тежина може да ви донесе проблеми во бременоста, од кои најважни се ризикот од гестациски дијабет и тешкото ослободување од вишокот килограми по породувањето.

​​​​​​​

Автори на текстот:

  • Марија Ивановска

  • д-р Денис Ал Кхалили

  • Организација Лулка