Капењето е дел од негата на бебето кој може
да претставува стрес за родителите, радост за бебето, голема чест и задоволство
за бабите, најобична рутина. Сите овие фази може да бидат застапени во едно
исто семејство, со истото бебе. Приказната често се одвива вака: вообичаено се
работи за прво бебе во семејството. Уште пред раѓањето родителите се среќаваат
со информации и искуства, за тоа колку е важно капењето на бебето, па дали да
се капе секој ден или на неколку дена, што со папчето, негата да биде ваква или
онаква, да се бања пред да падне папчето или не, дали да се одмива пеленската
регија на секое менување пелена и слично. Од сите овие информации со назнака
Многу важно – ВНИМАВАЈТЕ!, кај младите родители расте нивото на анксиозност
како што се приближува моментот на првото капење на бебето. Да се разбереме,
капењето е важно и претставува еден од основните предуслови за здрав раст и
развој на бебето. Но не е ни приближно толку комплицирано.
Што е важно?
Важно е да бидете присебни, фокусирани и да ги надминете стравовите дека капењето е страшно. Тоа се надминува со посетување на часови за психо-физичка подготовка за породување и основи за нега на бебето. На овие часови ќе дознаете повеќе основни информации, но и ќе вежбате практично, се разбира со бебе-кукла. Тоа значително ќе Ви помогне и ќе ја зголеми Вашата самодовреба дека може да ја изведете безбедно оваа многу сложена операција 😊. Како и за многу други работи во текот на негата на новороденчето и доенчето, и за капењето важно е да бидете смирени, внимателни и самоуверени, бидејќи таа Ваша смиреност може да се пренесе и на бебето па и тоа да биде помирно. Секако и Вашата вознемиреност и страв може да се пренесе на бебето, па и тоа да биде вознемирено, плачливо и раздразливо и да го направи целото искуство уште понепријатно. Второ и многу важно е да имате соодветна опрема која е потребна за капење. Важно е да имате кадичка со соодветна големина, и секако термометар за вода. Термометарот, иако едноставен и навидум одвишен реквизит, е многу важен. Понекогаш, во целата возбуда и анскиозност при подготовките за капење, може да помине доста време, да се подизлади водата и ненамерно да го ставиме бебето во млака наместо во топла вода. Секако, со редовно користење на термометарот за вода, ќе бидете безбедни и од изгореници на бебето од претопла вода. За безбедно и опуштено капење на бебето пожелно е да имате и додаток за во кадичката кој ќе го одржува бебето во посакуваната положба безбедно над водата. Овој дел може да биде и вграден во самата кадичка, но доколку го нема, многу корисно е ако го обезбедите дополнително. Неговата улога е да го држи бебето во позиција помеѓу нозете, под пазувите и со главата над водата, истовремено му овозможува на бебето слободно да ги движи рацете и нозете и радосно да прска наоколу со водата. Останатите важни работи ги сочинуваат козметика, пешкир или бањарка за бебе, останати аксесоари за нега и секако играчка за во вода. Избегнувајте ги гумените играчки кои се полнат со вода, бидејќи утврдено е дека може да бидат контаминирани со различни и штетни микроорганизми поради честата изложеност на влага и задржување на вода во нив.
Кога напролет шетаме надвор со бебе и мало дете, многу е важно облеката да биде слоевита. Да можете по потреба да соблечете еден слој кога е топло или да облечете плус еден слој кога ќе залади. Не сакате да го преладите Вашето малечко, ниту да му биде премногу топло, па да биде кенкаво и раздразливо. Обидете се да се држите до правилото, кога шетате надвор, бебето да го облекувате еден слој повеќе од вас, без разлика дали времето е топло или посвежо. Така ќе ја избегнете честата ситуација, бебето да биде премногу облечено и покриено со ќебе, а вие да шетате со кратки ракави и да уживате на пријатното пролетно сонце.
За родителите со деца кои сега проодуваат или веќе одат, но не се многу сигурни во одењето па може да паднат и да се повредат, корисни се појасите за шетање и проодување. Во оваа фаза (околу 12 до 18 месечна возраст) бебето не сака да седи во количка, станува многу љубопитно и сака да ги развива своите моторни способности (движење, одење). За да го поштедите бебето од паѓање и гребнатини, а себе си од болка во половината, користете појас за проодување, кој е многу корисна и безбедна алатка ако правилно се користи.
Доколку имате поголемо дете, оставете ги накратко муабетите со другите мајки и татковци и прошетајте низ дрвјата и грмушките со вашето дете. Сигурно ќе уживате во заедничката дружба, а детето ќе има безброј прашања за се околу вас. Игрите како брканица, топка, криенка, играње во песок се работи кои детето, за да ги игра, треба да ги научи од некого. Сметаме дека мајката и таткото се најдобри учители за малото дете. Така низ игра Вашето дете странува свесно за своите способности и ги развива. Доколку падне или се сопне, не го карајте, туку секој пат јасно ставете му до знаење дека мора да внимава. Моторните вештини, но и вниманието и концентрацијата со кои детето се движи и преминува препреки, се учат на релативно рана возраст. Ако не се научи да внимава и не вежба секојдневно преку игра, детето може да биде склоно кон паѓање и повреди во раното детство.
Како да се капе бебето?
Во однос на начинот на капење, важно е првите денови додека отпадне и зарасне папчето бебето да се бања во проточна вода. Ова може да се изведе со потурање, за што препорачуваме прво да имате подготвена топла вода и леген над кој ќе се постави бебето за да ја собира водата. Некои родители во оваа рана фаза го бањаат бебето и под чешма, за што сметаме дека е ризично поради можната варијабилност на односот на топла и ладна вода. По зараснување на папчето, кое се случува отприлика по 2 недели, бебето може да се потопи и да се бања во кадичка, а многу брзо бебињата се навикнуваат на овој ритуал и навистина уживаат. За да се намали стресот кај бебето, може на почеток, додека го подготвувате и спуштате во водата да биде повиено во фетална положба со тетра пелена. Откако ќе се потопи и започне капењето, треба да го отповиете бебето и да му овозможите слободно да ужива во капењето.
Безбедноста е најважна
За крај, особено важно за сите родители, и за оние со мало бебе и за оние со веќе поголеми дечиња. Секогаш, при капење на бебето и во близина на вода најважно е детето да биде под надзор на возрасен, без разлика дали се работи за бањање на бебе во кадичка или за одмор покрај базен, езеро или море. За да спречите незгода, не го оставајте вашето бебе само во кадичката ни за момент. Обидете се да направите листа за се што ви е потребно и подгответе се однапред, за да не мора да го оставате бебето без надзор барајќи нешто во другата соба. Ако го бањате бебето заедно, двајцата родители, еден од вас треба да биде постојано со бебето и да го надгледува додека тоа ужива во водата. Доколку сте на одмор или се наоѓате во близина на базен или друга отворена водна површина, важно е пристапот на детето до вода да биде контролиран од возрасен или на друг начин ограничен, а родителите треба будно и трезвено да го следат и контролираат движењето на детето.
Автори на текстот:
Марија Ивановска
д-р Денис Ал Кхалили
Организација Лулка
