Масажа на бебе – нежната моќ на допирот за помалку грчеви, повеќе спокој и подобар сон
Кога ќе станеш мајка, често се наоѓаш во свет полн со прашања, чувства и нови предизвици. Првите недели со бебето носат многу нови доживувања. Сè е ново – и за него и за тебе. Се запознавате, барате блискост и начин заедно да го пронајдете својот ритам. Во овој нежен, но често и напорен период, еден од најмоќните, а воедно и наједноставни начини да се поврзеш со своето бебе е нешто што секогаш го имаш со себе – твојот допир.
Допирот е првиот јазик што бебето го разбира. Дури и пред да научи да се насмевне или да те погледне в очи, уште во првите часови по раѓањето ја чувствува твојата топлина, ритамот на твоето дишење и твојот допир. Кога нежно ќе го погалиш, ќе го држиш блиску до себе или ќе го масираш, му помагаш да се почувствува сигурно и да стекне доверба. Тоа е основа за неговиот понатамошен емоционален, телесен и когнитивен развој.
Масажата на бебето е едноставна и не бара многу – само малку мир, твоите нежни раце и подготвеност неколку моменти целосно да му се посветиш. Драга мамо, во продолжение ќе дознаеш како масажата може да го поддржи развојот на бебето, како безбедно да ја применуваш и зошто може да стане вашиот најубав секојдневен ритуал.
Значењето на допирот и телесниот контакт во раниот развој
Во првите месеци од животот, бебето го доживува светот пред сè преку своето тело. Допирот му помага да се ориентира, да се смири и да се поврзе со тебе. Во утробата постојано чувствувало допир – било опкружено со плодова вода, ги чувствувало твоето тело, движењата и звуците. По раѓањето, одеднаш се наоѓа во свет што допрва треба да го запознае. Веќе го нема постојаното чувство дека е прегрнато, ниту пригушените звуци и меката светлина. Сè е поинтензивно. Кога нежно ќе го прегрнеш, му кажуваш: „Сè уште си безбедно. Сè уште си сакано. Тука сум, не си само.“
Истражувањата покажуваат дека редовниот допир, особено нежната масажа, може да помогне во намалувањето на хормоните на стрес и да го поттикне лачењето на окситоцин (хормонот поврзан со блискоста), како и поволно да влијае врз срцевиот ритам, дишењето и варењето. Бебињата што редовно се масираат често спијат подобро, плачат помалку, посмирени се, имаат подобро варење и побрзо добиваат на тежина.
Масажата не влијае само врз бебето – таа може да те смири и тебе, мамо. Кога ќе застанеш за миг и ќе се поврзеш со него преку допирот, ја чувствуваш таа посебна блискост што ги надминува зборовите.
Придобивки од масажата за бебето и за родителите
Нежната масажа може да му помогне на бебето на повеќе начини. Таа го поттикнува варењето и може да ги ублажи непријатностите предизвикани од гасови, запек и грчеви. Со смирувачките движења, бебето полесно се опушта, а тоа може да му помогне и подобро да заспие. Масажата ја поттикнува циркулацијата и му дава можност на бебето да го почувствува своето тело преку нежни допири.
Овие моменти се важни и за вашата блискост, особено во првите недели, кога сè уште го пронаоѓате заедничкиот ритам на хранење, одмор и секојдневна грижа. Многу мајки велат дека масажата ги смирува и нив. Во период кога сè изгледа ново и непредвидливо, неколку минути посветени на бебето можат да донесат чувство на поврзаност и спокој.
Кога е вистинското време за масажа?
Избери момент кога бебето е будно, мирно и расположено за контакт. Добро е да биде нахрането, но не го масирај веднаш по хранењето. Можеш да пробаш по кратка дремка, по пресоблекување или како дел од вечерната рутина.
Следи како реагира бебето. Ако се повлекува, плаче или ја врти главата настрана, прекинете и обидете се другпат. Сосема е во ред масажата да почека момент кога и двајцата ќе можете да уживате во неа.
Масажата треба да се случува кога и бебето е расположено за допир. Тоа добро го чувствува и твоето расположение – ако си расеана, вознемирена или премногу уморна, подобро е да ја одложиш. Кога си смирена и присутна, и бебето полесно ќе ужива во заедничкиот момент.
Основни техники за масажа што лесно можеш да ги научиш
За нежна масажа на бебето не ти е потребно посебно знаење. Можеш да почнеш со стомачето: загреј ги дланките и прави бавни, кружни движења во насока на стрелките на часовникот. Овој допир може да го поттикне варењето и да ги ублажи грчевите.
Потоа нежно погали ги нозете, од бутовите кон стапалата, и рацете, од рамената кон дланките. Движењата нека бидат мирни и рамномерни. За градниот кош, постави ги рацете на средина и движи ги кон надвор, како да ги отвораш крилјата на пеперутка.
Со врвовите на прстите можеш нежно да поминеш по веѓите, образите и носето. Ако бебето сака да лежи на стомаче, погали му го и грбот – од вратот надолу, со бавни движења. Во текот на целата масажа следи како реагира и застани ако му е непријатно.
Што ти е потребно за масажа на бебето?
Потребни ти се само неколку работи за масажата да биде пријатна: топла и проветрена просторија, мека подлога, како подлога за пресоблекување, ќебенце или јога-подлога, и тетра пелена или крпа.
Можеш да користиш и малку природно масло за масажа, на пример сончогледово или масло од сладок бадем. Избери масло без додадени мириси и етерични масла.
Подготви се и ти
Пред да започнеш, одвои миг за себе, мамо. Смири се и вдиши длабоко неколку пати. Ако користиш масло, прво загреј неколку капки меѓу дланките за допирот да му биде попријатен на бебето.
Потоа нежно обрати му се и покажи му дека ќе започнеш со масажа. Дај му време да реагира и следи дали му годи допирот. Ако е мирно и расположено, можете да започнете.
Совети за безбедна масажа
Масирај го бебето на подот, на мека подлога. Така ќе биде на безбедно место, каде што може слободно да се движи. Започни полека: прво нежно погали го и кажи му што ќе правите. Движењата нека бидат нежни и ритмични, без брзање и силен притисок.
Внимателно следи како реагира. Ако плаче, се врти настрана или го затегнува телото, престани и обидете се другпат. Не го масирај веднаш по хранењето. Ако има температура, кожно заболување или посебна здравствена состојба, прво посоветувај се со здравствен работник.
Не мора секое движење да биде совршено. Најважно е да бидеш присутна, смирена и внимателна кон потребите на бебето.
Масажата како секојдневен ритуал на блискост
Масажата е можност да се смирите и да поминете неколку нежни моменти заедно, дури и во напорен ден. Со време може да стане ваш мал секојдневен ритуал – пет минути по вечерното капење или неколку тивки моменти по утринското будење. Тоа е време само за вас, исполнето со допир, блискост и чувство на сигурност.
На бебињата не им се потребни совршени родители. Потребни им се присутни и грижливи родители што им даруваат многу нежен допир и љубов. Секој допир е важен – и кога масажата трае само три минути, и кога си уморна, и кога не оди сè како што си замислила.
Ти си доволна. А твојот допир има моќ.