Потреба од дополнително хранење
Многу мајки со своите бебиња се соочуваат со тешкотии при доењето – проблеми со правилното поставување на бебето на града, недоволна количина млеко или потреба од дополнување со адаптирано млеко. Понекогаш е потребна само мала помош при учењето на правилно хранење.
Сето тоа е сосема прифатливо.
Тоа во никој случај не значи дека мајката потфрлила во својата нова улога, ниту пак дека нејзиното бебе ќе остане гладно.
Мајчиното млеко е најдобар извор на исхрана за вашето бебе. Доколку, од која било причина, исклучивото доење не е можност за вас, комбинираното хранење овозможува вашето бебе и понатаму да ги добива важните хранливи материи од мајчиното млеко. Колку повеќе мајчино млеко прима бебето, толку поголеми се придобивките за неговото здравје.
Зошто на моето бебе му е потребно дополнително хранење?
Постојат повеќе причини поради кои на бебето може да му биде потребно дополнително хранење за време на престојот во болница или по заминувањето дома. Некои од нив се:
- Количината на мајчино млеко е мала или не сте во можност да доите.
- На бебето му се потребни дополнителни калории или течности за правилно зголемување на телесната тежина.
- Бебето брзо се заморува за време на хранењето, што може да влијае врз неговото напредување.
Дополнителното хранење е начин на бебето да му се обезбеди дополнителна храна и енергија покрај доењето. Дополнителната течна храна што му се дава на бебето се нарекува дохрана.
Најчестите методи на дополнително хранење вклучуваат:
- хранење со шише,
- помагала за поддршка при доење,
- хранење со прст.
Доколку на вашето бебе му е потребна дохрана, посоветувајте се со советник за доење.
Помагала за поддршка при доење
Помагалата за поддршка при доење најдобро функционираат кај бебиња кои правилно се поставуваат на града и добро цицаат. Почетокот со нивна употреба понекогаш може да биде предизвик и потребно е малку вежбање, но со текот на времето станува сè полесно. Побарајте помош од патронажна сестра или советник за доење за правилна примена на еден од следниве два начина.
Метод 1: Поставување на помагалото на градата пред бебето да ја фати брадавицата
1. Темелно измијте ги рацете.
2. Подгответе ја дохраната од измолзено мајчино млеко или адаптирано млеко.
3. Ако користите шприц, прикачете го поширокиот крај на цевчето за хранење на врвот на шприцот. Извадете го клипот од шприцот и наполнете го со дохрана. Околу горниот дел од шприцот поставете еластична лента, а потоа прицврстете го на облеката со сигурносна игла. Дното на шприцот треба да биде во иста висина со главата на бебето.
4. Ако користите шише, протнете го потесниот крај од цевчето за хранење низ отворот на цуцлата, а поширокиот крај нека допира до дното на шишето. Наполнете го шишето со дохрана и поставете го на рамна површина близу до вас, во висина на главата на бебето.
5. Прицврстете го потесниот крај од цевчето на градата, веднаш покрај брадавицата. Цевчето може да се спушта од горниот или страничниот дел на градата, а неговиот крај треба да завршува точно кај врвот на брадавицата.
6. Поставете го бебето на града така што со устата истовремено ќе ги опфати и градата и крајот на цевчето.
Метод 2: Поставување на помагалото во устата на бебето откако ќе ја фати градата
1. Темелно измијте ги рацете.
2. Подгответе ја дохраната од измолзено мајчино млеко или адаптирано млеко.
3. Ако користите шише, протнете го потесниот крај од цевчето за хранење низ отворот на цуцлата, а поширокиот крај нека допира до дното на шишето. Наполнете го шишето со дохрана и поставете го на рамна површина близу до вас, во висина на главата на бебето.
4. Поставете го бебето на града.
5. Кога бебето ќе почне да цица, полека вметнете го цевчето од страничниот дел на устата. Насочете го кон непцето, над јазикот. Престанете да го придвижувате кога ќе забележите дека дохраната почнува да се движи низ цевчето кон устата на бебето. Потоа прицврстете го цевчето на градата.
Кај Метод 1 и Метод 2 ќе знаете дека цевчето за хранење е правилно поставено ако забележите дека дохраната почнува да се движи низ цевчето секогаш кога бебето цица. На тој начин, дополнителното хранење овозможува бебето да добие дополнителна храна и калории за време на доењето, доколку тоа е потребно.
Постојат повеќе методи што можат да се користат за дополнително хранење на бебиња кои се дојат. Хранењето обично трае од 20 до 30 минути, а истото важи и за дохраната. Држењето на бебето во положба за доење и за време на дополнителното хранење му овозможува да ги користи природните вештини за хранење со кои е родено.
Доколку бебето прима дохрана, потребно е редовно да се следи неговата телесна тежина за да се провери дали правилно напредува. Во многу случаи, со текот на времето дополнителното хранење повеќе нема да биде потребно и ќе може да се продолжи само со доење.